दमक — राष्ट्रिय एकता, सामाजिक सद्भाव तथा आपसी भाइचारालाई थप सुदृढ बनाउने उद्देश्यले शुक्रबार दमक चोकमा ‘सद्भाव यात्रा’ आयोजना गरिएको छ।

यात्रामा विभिन्न समुदायका नागरिक, सामाजिक अभियन्ता, स्थानीय प्रतिनिधि तथा सर्वसाधारणको सहभागिता रहेको आयोजकले जनाएको छ। सहभागीहरूले समाजमा आपसी सम्मान, धार्मिक सहिष्णुता र सामाजिक एकतालाई अझ मजबुत बनाउने सन्देश दिएका थिए।

आयोजकका अनुसार पछिल्ला दिनहरूमा देशका विभिन्न स्थानमा देखिएका सामाजिक तथा सामुदायिक तनावलाई मध्यनजर गर्दै नागरिकबीच एकता, सहकार्य र सद्भावको वातावरण कायम राख्न कार्यक्रम आयोजना गरिएको हो। कार्यक्रममा सहभागीहरूले कुनै पनि प्रकारका अफवाह, द्वेषपूर्ण अभिव्यक्ति तथा हिंसात्मक गतिविधिबाट टाढा रहँदै संवाद र सहकार्यबाट समस्या समाधान गर्नुपर्नेमा जोड दिएका थिए।

सद्भाव यात्राका क्रममा सहभागीहरूले राष्ट्रिय एकता, सामाजिक सद्भाव र आपसी भाइचारासम्बन्धी सन्देश अंकित प्लेकार्ड बोकेका थिए। उनीहरूले विविधताभित्रको एकतालाई नेपालको प्रमुख विशेषता भन्दै सबै समुदायबीच विश्वास र सहकार्य कायम राख्नुपर्ने धारणा व्यक्त गरे।

आयोजकले यस्ता कार्यक्रमले समाजमा सकारात्मक सन्देश प्रवाह गर्नुका साथै विभिन्न समुदायबीच आपसी सम्बन्ध थप सुदृढ बनाउन सहयोग पुग्ने विश्वास व्यक्त गरेको छ। कार्यक्रम शान्तिपूर्ण रूपमा सम्पन्न भएको जनाइएको छ।